Bikaner. भारत सरकार री नवरत्न कंपनी कोल इंडिया लिमिटेड (Coal India Limited ) बीकानेर जिला रा पूगल मांय 1 हजार 190 मेगावाट बूता रो सौर उर्जा संयंत्र (Solar Energy Plant) लगावेला। ईं सारु कोयला मंत्री प्रल्हाद जोशी अर मुख्यमंत्री अशोक गहलोत री मौजूदगी मांय कोल इंडिया लिमिटेड अर राजस्थान राज्य विद्युत उत्पादन निगम लिमिटेड बीचे करार माथे सही करी ज्यी।
ईं मौके राख्यी ज्या कार्यक्रम मांय केंद्रीय मंत्री प्रह्लाद जोशी कह्यो के केंद्र सरकार बिजली री मौजूदा अर आवता बगत री चुनौतियां ने ध्यान राखता थकां नवीकरणीय उर्जा बणावण ने बधावो देवण माथे खास ज़ोर दीनो है। वे कह्यो के सरकार नई तकनीक काम लेता थकां कोयला ऊं बिना प्रदूषण बिजली बणावण सारु ई काम कर रही है। जोशी कह्यो के देश मांय प्रति व्यक्ति बिजली खपत साल 2040 तांई लगभग दोगुनी व्हे जावेला।
मंत्री कह्यो के देश मांय कोयला री कमी नी है अर ज़मीं हेटे ऊं कोयलो काडण मांय बधोतरी व्ही है, पण कोयलो काम लेवण परां अब केई भांत रा प्रतिबंध है। मंत्री प्रल्हाद जोशी कह्यो के राज्य ने पैली रोजीना कोयला री 12-13 रैक दी जाती ही, जिण ने बधा र साढे सौलह रैक रोजीना करी ज्यो है।
वे कह्यो के छत्तीसगढ़ री पारसा कांटा खान ऊं कोयलो निकाळबो सरु व्ह्यां पाछै राज्य मांय कोयला री समस्या नी रेहवेला। प्रल्हाद जोशी कह्यो के देश मांय खनन हलका मांय करी ज्या बदलावां रा सकारात्मक नतीजा मिल्या है। ईं मौके मुख्यमंत्री अशोक गहलोत कह्यो के प्रदेश मांय केई भांत री सौर ऊर्जा परियोजनाएं लाग्योड़ी है अर अब प्रदेश मांय ई सूरज री रोशनी ऊं बिजली बणावण रा उपकरण विकसित करण माथे ध्यान दियो जा रह्यो है।
वे कह्यो के सरकार बिजली कटौती रोकण री पूरी कोशिश कर रही है। कोल इंडिया लिमिटेड री ईं सौर उर्जा परियोजना मांय 5 हजार 400 करोड़ रुप्या ऊी रकम रो निवेश व्हेला। आ परियोजना कोई दो साल मांय पूरी व्हेला।
