उत्तर प्रदेश रा पैली वाळा मुख्यमंत्री मुलायम सिंह यादव (Mulayam Singh Yadav) आज सवेरे देवलोक व्हे ग्या। 82 साल रा यादव लंबा बगत ऊं मांदा हा। वे हरियाणा मांय गुरूग्राम रा एक गैर सरकारी अस्पताल मांय अंतिम सांस लीनी। वां ने 22 अगस्त ने अस्पताल मांय भर्ती करायी ज्या हा जठै एक अक्तूबर री रात ने वां ने आईसीयू मांय भर्ती करी ज्या हा।
उत्तरप्रदेश मांय मैनपुरी रा सांसद मुलायम सिंह यादव सात दफ़ा लोकसभा सारु चुणी ज्या हा। मुलायम सिंह देश रा रक्षामंत्री ई रह्या। साल 1939 मांय उत्तर प्रदेश रा सैफई गांव मांय जन्म्या मुलायम सिंह यादव तीन दफ़ा उत्तर प्रदेश रा मुख्यमंत्री रह्या। साल 1996 ऊं 1998 बीचे वे रक्षा मंत्री रह्या। पहली दफ़ा साल 1967 मांय उत्तरप्रदेश विधानसभा सारु चुणी ज्या मुलायम सिंह यादव 10 दफ़ा विधायक बण्या।
राष्ट्रपति द्रौपदी मुर्मू, उपराष्ट्रपति जगदीप धनखड़ ,प्रधानमंत्री नरेंद्र मोदी , गृहमंत्री अमित शाह, रक्षा मंत्री राजनाथ सिंह , केंद्रीय मंत्री डॉक्टर जितेंद्र सिंह अर उत्तरप्रदेश रा मुख्यमंत्री योगी आदित्यनाथ समेत केई नेता मुलायमसिंह यादव रे देवलोक व्हेवण परां गहरो दुःख जतायो है।
देवलोक व्ह्या नेता मुलायम सिंह यादव रा मान मांय उत्तरप्रदेश मांय तीन दिन रा सरकारी शोक रो ऐलाण करी ज्यो है। मुलायम सिंह यादव रो सरकारी मान सागे दाग कर्यो जावेला।
